公視新聞網 https://news.pts.org.tw/article/746405 林園鳳芸宮媽祖海巡 船隊20外隻出發往安平 發布時間：2025/4/10 19:15 更新時間：2025/4/10 22:29 https://www.youtube.com/watch?v=2XWSM4GGKQQ 高雄市定民俗，4年一科的林園鳳芸宮媽祖海巡活動，4/10透早七點，20外隻漁船載海巡 媽等神尊對中芸港出發，往臺南安平港海上巡香。廟方表示，這擺的巡境破紀錄有五工， 而且也是頭一擺會佇安平港駐駕過暝，予閣較濟信眾有機會參加。（新聞標題、導言及內 文皆為台語文） 廟方人員勻勻仔將媽祖鑾轎囥去船頂，進行安座，其他參與的神明也已經相紲上船矣，準 備這科的海上巡香活動。 初十透早中芸漁港都鬧熱滾滾。四年一科的海上巡香，由海巡媽押陣，佇水僊尊王做先鋒 船的tshuā領之下，載著眾神的漁船一一開出港，前往臺南安平進行會香活動。廟方表示 ，往過考慮著天氣佮水路的問題，會盡量共時間縮短，今年是破紀錄，活動攏總有五工， 也是第一擺佇外位過暝。 鳳芸宮管委會總幹事 王偉旭：「臺南佮高雄的交情已經遮久矣，是按怎攏無機會，共遮 媠的LED電火，留佇遐予臺南市民看？一直共咱邀請，所以咱佇這改就破紀錄，留佇臺南 遐過一暝予怹看。」 經過跋桮選出來的20外隻漁船，逐隻攏妝甲媠噹噹，這船頂懸除了規定的竹尾仔、滿載旗 以外，其他包括船身的LED電火猶閣有音響等等，攏是船長怹家己發揮創意妝娗的，雖然 所有的開銷攏愛家己來，毋閣船長攏講，怹的用心無為著啥，干焦希望予閣較濟人看著高 雄林園才有的媽祖海巡文化。 船長：「這是無規格矣，廟方嘛無要求阮愛按怎妝；阮只是想講，逐家用一寡仔心，共媽 祖鬥鬧熱。」 船長：「海音館彼个所在，人潮誠濟矣。人若來看就會鬥宣傳出去，真正袂bái。猶閣有 （漁船）排佇咧海音館頭前，真正矣，毋管是無人機抑是翕相，是特別媠。」 廟方表示，媽祖海巡船隊，沿途會接受岸邊信眾的朝拜，11早起會對臺南回程，轉來駐駕 高雄港，到時會有祝壽大典以及各種的藝陣展演，邀請民眾做伙來感受這个無仝款的媽祖 海巡文化。 記者 許嘉茹 邱紹揚 高雄報導 唐嘉良/編輯 -- ※ 發信站: 批踢踢實業坊(ptt.cc), 來自: 111.255.103.144 (臺灣) ※ 文章網址: https://www.ptt.cc/bbs/Gossiping/M.1744296627.A.4A0.html