公視新聞網 https://news.pts.org.tw/article/725624 設計予日本人的台語課 臺師大推母語國際化 發布時間：2024-11-23 19:15 更新時間：2024-11-23 19:47 郭柏均 張君豪 / 台北報導 https://www.youtube.com/watch?v=T9bRUZVlzmY 臺灣師範大學拜六，辦一个設計予日本人學臺語的課程，由來自日本學臺語已經18年的老 師，用日語教濟濟佇臺灣的日本人，臺文羅馬字的聽、講、讀、寫。有學員是本身對臺語 有興趣，也有人是因為工課需求來學。（這則新聞標題、前言、內文為臺語文。） 老師tshuā逐家唸：「日本人、日本人。」 對唸拼音開始、到寫羅馬字，攏是用日本話學台語，因為台跤的學生，是踮台灣生活的日 本人；親像這位岩澤侑生子小姐，本身是演員，踮台灣2年外，因為搬戲愛講台語、家己 也咧做台灣文化研究，就來報名這个台語課。 學員岩澤侑生子講：「我的研究是日本時代的臺灣戲劇，最近臺灣的當代戲劇，用台語來 表演愈來愈濟。」 這个課吸引40个人來報名，除了演員，閣有一寡學員是來自日本，佇臺灣日語系、日語補 習班教冊的老師。 臺灣師範大學臺文系副教授呂美親講：「in(日本人)可能佇臺灣嘛生活一段時間，in嘛感 覺 臺灣話若像誠趣味，抑無逐家(臺灣人)咧笑，in攏聽無，抑是講較深的藝術的物件， 攏聽無。」 台頂教這節台語課的，是來自日本，教言語社會科的吉田真悟老師，伊自大學開始接觸臺 灣文化，發見臺灣語言真多元，就開始學臺語，到今已經18年。 日本一橋大學言語社會科助理教授吉田真悟分享：「（彼時）有關臺灣的冊，攏是咧講臺 灣民主化，這馬民主化、語言嘛是自由化，既然我想欲去臺灣，我干焦會曉講華語是無夠 的。」 移民署統計到九月，臺灣有超過萬六个日本人，台師大發現遮的人捷因為袂曉臺語，會減 少佮臺灣人交流的機會；這个設計予日本人的台語課，是台師大語文學國際化的計畫之一 ，in希望未來通常態化舉辦，予閣較濟有心學臺語的日本人進修。 張曼亭/編輯 -- ※ 發信站: 批踢踢實業坊(ptt.cc), 來自: 111.255.112.185 (臺灣) ※ 文章網址: https://www.ptt.cc/bbs/Gossiping/M.1732419196.A.4E3.html